“Müasir İnternet Resurslarının İnkişafı” İctimai Birliyi Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Şəhid ailələrinin və müharibə iştirakçılarının sosial təminatının gücləndirilməsi dövlət siyasətinin prioritetlərindəndir” layihəsi çərçivəsində Yeni Azərbaycan Partiyasının (YAP) Binəqədi Rayon Təşkilatının inzibati binasında şəhid ailələri və müharibə iştirakçılarına hüquqi dəstək adlı tədbir keçirib.
Bineqedi.com saytı xəbər verir ki, tədbirdə Binəqədi Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Səməndər Mənəfov, “Müasir İnternet Resursların İnkişafı” İctimai Birliyinin sədri, layihə rəhbəri Zamin Zeynal, Birliyin sədr müavini Sərvaz Hüseynoğlu, Hüquq departamentinin rəhbəri Nicat Cəfərov, Azərbaycan Respublikasının Vəkillər Kollegiyasının 38 saylı Vəkil Bürosunun rəhbəri Orxan Mahmudov, büronun vəkili Elşad Daşdəmirov, ictimai-siyasi fəal şəxslər, şəhid ailələri, qazilər, müharibə iştirakçıları iştirak edərək çıxış ediblər.
Çıxış edənlər bildiriblər ki, Ümummilli Lider Heydər Əliyev Azərbaycana rəhbərlik etdiyi dövrdə daima şəhid ailələri və müharibə iştirakçılarına diqqət və qayğı ilə yanaşıb. Sevindirici haldır ki, hazırda bu ictimai-siyasi kurs Prezident, Müzəffər Ali Baş Komandan İlham Əliyev və birinci xanım Mehriban Əliyeva tərəfindən şəhid ailələri və müharibə iştirakçılarına dövlət qayğısı və dəstəyi uğurla davam etdirilir.
Natiqlər onu da deyiblər ki, “Müasir İnternet Resurslarının İnkişafı” İctimai Birliyinin şəhid ailələrinə və müharibə iştirakçılarına hüquqi dəstək yönümündə həyata keçirdiyi layihə dövlət-QHT münasibətlərin inkişafı fonunda olduqca faydalı, səmərəli vətəndaş cəmiyyəti təşəbbüsdür. Bu cür ictimai, hüquqi dəstək yönümündə maarifləndirmə işlərinin gələcəkdə də davamlı şəkildə keçirilməsi olduqca vacibdir.
Tədbirlə bağlı “Müasir İnternet Resurslarının İnkişafı” İctimai Birliyinin sədri Zamin Zeynal çıxışında qeyd edib ki, “Şəhid ailələrinin və müharibə iştirakçılarının sosial təminatının gücləndirilməsi dövlət siyasətinin prioritetlərindəndir” layihəsini həyata keçirməkdə əsas məqsəd qalib Prezident İlham Əliyevin həyata keçirdiyi uğurlu sosial siyasətə ictimai, hüquqi dəstək göstərməkdir.
Birlik sədri deyib ki, sözügedən layihənin icra planına uyğun olaraq Azərbaycan Respublikasının Vəkillər Kollegiyasının 38 vəkil bürosunun vəkilləri ilə birlikdə Binəqədi rayonunda şəhid ailələrini və müharibə iştirakçılarını narahat edən sosial, hüquqi problemlərə kömək məqsədilə hüquqi maarifləndirmə tədbiri keçirilib.
MİRİİB sədri onu da xüsusi olaraq vurğulayıb ki, Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi “Müasir İnternet Resurslarının İnkişafı” İctimai Birliyinin layihəsi əsasında reallaşdırılan şəhid ailələrinin və müharibə iştirakçılarına hüquqi dəstək adlı kitabça çap edilib. Bu kitabçalar İmişli, Abşeron, Binəqədi rayonlarında Birlik tərəfindən keçirilən tədbirlərdə hüquqi maarifləndirmənin daha da faydalı olması üçün şəhid ailələri və müharibə iştirakçılarına təqdim olunub.
Bineqedi.com
