Nizami Gəncəvinin 880 illik yubileyi münasibətilə “Xəmsə” milli intellektual oyunu üzrə turnir keçirilib. Bineqedi.info saytına verilən məlumata görə, Binəqədi rayon İcra Hakimiyyətinin dəstəyi, rayon Gənclər və İdman İdarəsinin təşkilatçılığı ilə Azərbaycanın görkəmli şairi və mütəfəkkiri Nizami Gəncəvinin 880 illik yubileyi münasibətilə məktəblilər arasında “Xəmsə” milli intellektual oyunu üzrə rayon turniri keçirilib.
Turnir Azərbaycanın tarixində müstəsna xidmətləri olmuş şəxsiyyətlərin tanıdılması, gənclər arasında Azərbaycan dilinin, tarixinin, mədəniyyət və incəsənətinin təbliği, intellektual inkişafın və elmi fəaliyyətin stimullaşdırılması məqsədi daşıyır.
Tədbirin mükafatlandırma mərhələsində Binəqədi rayon İcra Hakimiyyəti başçısı Aparatının əməkdaşı Amal Əsgərov, Binəqədi rayon Gənclər və İdman İdarəsinin əməkdaşları Sahil Hüseynzadə və Səadət Quliyeva iştirak etmişdir.
Çıxış edənlər bildirmişdir ki, Prezident cənab İlham Əliyev tərəfindən 2021-ci ilin “Nizami Gəncəvi ili” elan edilməsi, dövlətimizin Azərbaycançılığa, onun tarixinə və mədəniyyətinə olan böyük ehtiramının təzahürüdür. Milli-mənəvi dəyərlərə hörmət ulu öndər Heydər Əliyevin apardığı siyasətin mühüm tərkib hissələrindən idi. Məhz Ümummilli Lider Heydər Əliyev hakimiyyətdə olduğu dövrdə Azərbaycan mədəniyyətinə, milli-mənəvi dəyərlərə hər zaman xüsusi diqqət göstərib və bu siyasətin məntiqi davamıdır ki, bu gün ölkə üzrə mütəfəkkir şairimizin irsini təbliğ edən silsilə tədbirlər keçirilir. “Xəmsə” milli intellektual oyunu da belə silsilə tədbirlərdəndir.
Turnirdə iştirak edən 8 komanda arasında keçən gərgin bilik mübarizəsində Binəqədi rayon 83 nömrəli məktəb-liseyin “Yeddi Gözəl” komandası I yerə, Binəqədi rayon 299 nömrəli məktəb-liseyin “5 Buta” komandası II yerə və rayon 313 nömrəli tam orta məktəbin “Sirlər Xəzinəsi” komandası isə III yerə çıxmışlar.
Sonda turnirin qalibləri müvafiq dərəcəli diplom və medallarla mükafatlandırılmışdır.
Bineqedi.info
