Bakı Şəhər Mədəniyyət Baş İdarəsinin A. Məlikov adına 11 nömrəli onbirillik musiqi məktəbində görkəmli bəstəkar, Xalq artisti Arif Məlikovun anadan olmasının 89 illiyinə həsr edilmiş ədəbi-bədii tədbir keçirilib.
Bineqedi.com saytına verilən məlumata görə, musiqi məktəbində görkəmli bəstəkara həsr olunmuş guşə təşkil olunub.
Tədbirdə Bakı Şəhər Mədəniyyət Baş İdarəsinin rəisi İbrahim Əliyev də iştirak edib. Eləcə də 21 nömrəli onbirillik musiqi məktəbinin direktoru, professor Məmməd Quliyev və 16 nömrəli uşaq musiqi məktəbinin direktoru, Əməkdar müəllim Fikrət Budaqov tədbirdə iştirak ediblər.
Tədbirdə görkəmli bəstəkarın yaradıcılıq yolundan söhbət açılıb.
Qeyd olunub ki, görkəmli bəstəkarın xalqımız tərəfindən böyük rəğbətlə qarşılanan, sevilən əsərləri eyni həyəcan və coşqu ilə dünyanın hər bir ölkəsində dinlənilir, səhnələşdirilir. Arif Məlikov musiqisi ilə Azərbaycan musiqi sənəti dünyanın bir çox ölkəsində təmsil olunaraq rəğbət qazanır.
Bildirilib ki, böyük sənətkar məhsuldar fəaliyyəti ilə Azərbaycan tarixində və mədəniyyətində iz buraxmağı bacarıb və həm bəstəkar, həm rəssam, həm də müəllim kimi ölkəsinə xidmət göstərib.
Məktəbin direktoru Rövşən Məmmədov 11 nömrəli onbirillik musiqi məktəbinə dahi bəstəkarın adının verilməsinə görə ölkə rəhbərliyinə təşəkkürünü bildirib.
Sonra məktəbin şagirdləri görkəmli bəstəkarın seçilmiş əsərlərindən ibarət musiqi nömrələri ilə çıxış ediblər.
Tədbirin sonunda Bakı Şəhər Mədəniyyət Baş İdarəsinin rəisi İbrahim Əliyev iştirakçılara öz minnətdarlığını bildirib və yeni-yeni yaradıcılıq uğurları arzulayıb.
Bineqedi.com