Bakıda qadınlara qarşı dələduzluq edən şəxs saxlanılıb.
Bineqedi.info saytının report-a istinadən xəbərinə görə, hadisə 2019-cu ilin dekabr ayında Binəqədi rayon ərazisində qeydə alınıb.
Belə ki, naməlum şəxs bankomatın qarşısında Bakı şəhər sakini G.Cəlilovanı aldadaraq onun bank kartını dəyişib. Həmin şəxs yanvarın 13-də isə qadına məxsus olan bank kartından 260 manat pul çıxarıb.
Daha sonra G.Cəlilova hüquq-mühafizə orqanları əməkdaşlarına müraciət edib.
Binəqədi Rayon Polis İdarəsinin (RPİ) 6-cı Polis Bölməsi əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Sumqayıt şəhər sakini, 1995-ci il təvəllüdlü, əvvəllər məhkum olunmuş Hüseynxan Yadigarlı müəyyən olunaraq tutulub.
Araşdırmalar zamanı məlum olub ki, o, digər üsullarla N.Kərimova da qarşı dələduzluq edib.
Hər iki faktla bağlı araşdırma aparılır.
