2 Fevral – Azərbaycan Gəncləri Gününün təsis edilməsinin 25 illiyi münasibətilə elan olunmuş “Gənclər həftəsi” çərçivəsində Binəqədi Rayon İcra Hakimiyyətinin dəstəyi, Binəqədi Rayon Gənclər və İdman İdarəsi və Binəqədi Gənclər Evinin birgə təşkilaçılığı ilə “Gənclik və yeni baxışlar” adlı forum keçirilib.
Bineqedi.info saytına verilən məlumata görə, forumda çıxış edən Binəqədi Rayon Gənclər və İdman İdarəsinin rəisi Namiq Tarverdiyev “Azərbaycan Gəncləri Günü”nün təsis edilməsi tarixinə nəzər salaraq bildirib ki, gənclərin I Forumundan başlayan bu gün ölkəmizdə gənclərə göstərilən diqqətin əyani sübutudur.
Əsası ümummilli lider Heydər Əliyev tərəfindən qoyulmuş dövlət gənclər siyasəti Azərbaycan gəncliyinin inkişafında, onların vətənpərvər ruhda tərbiyə almasında böyük rol oynayıb.
Uğurla icra olunan dövlət proqramları, həyata keçirilən strategiya onu deməyə əsas verir ki, Azərbaycan gəncliyi bu gün ictimai həyatın bütün sahələrində aktiv fəaliyyəti ilə seçilir və siyasi, iqtisadi, humanitar, sosial tədbirlərin həyata keçirilməsində mühüm rol oynayır. Gənclərin fəaliyyəti üçün dövlətin yaratdığı geniş imkanlar nəticəsində bu təbəqə cəmiyyətin aparıcı qüvvəsinə çevrilmişdir və gəncliyimiz ölkəmizin gələcəyi uğrunda inamlı addımlar atmaqdadır.
Son illərdə qazandığımız uğurlar bir daha deməyə əsas verir ki, ölkəmizdə Ali Baş Komandan cənab İlham Əliyevin birbaşa rəhbərliyi və qayğısı ilə həyata keçirilən gənclər siyasəti öz hədəflərinə çatıb.
Sonra Binəqədi Gənclər Evinin məsul əməkdaşı Zeynal Rəşidli çıxışında qeyd edib ki, bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclər formalaşır. Gənclər siyasəti gənc nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə, bütövlükdə, kreativ gəncliyin formalaşmasına şərait yaradıb.
Forumda “Forest School Azerbaijan”-nın təsisçisi Fəqan Hüseynov, “İtalk.az” kursunun təsisçisi və rəhbəri Gülnar Əliyeva və “Natiqlik və ünsiyyət bacarıqları” üzrə peşakar təlimçi Zaur Cahangirov və Vətən müharibəsi qazisi Ceyhun Sədrayev gənclərlə maraqlı müzakirələr aparmış, öz şəxsi həyat və inkişaf təcrübələrini bölüşüb.
Sonda uğurlu gənclərə müvafiq diplom və hədiyyələr təqdim olunub.
Bineqedi.info
