Binəqədi rayonunun ən böyük küçələrindən biri də İbrahimpaşa Dadaşov küçəsidir. 8-ci mikrorayon ərazisindən başlayaraq bir neçə kilometrlik ərazini əhatə edən bu küçədə onminlərlə insan yaşayır. Hər gün işə gedərkən, işdən gələrkən Binəqədi sakinləri sərnişin avtobuslarında İbrahimpaşa Dadaşovun adını eşidirlər.
Adını hər gün eşitsələr də, yəqin ki, İbrahimpaşa Dadaşovun kim olduğu barədə çoxları məlumatsızdır. Bütün bunları nəzərə alaraq, Bineqedi.com saytı İbrahimpaşa Dadaşovun kimliyi ilə bağlı bəzi məlumatları təqdim edir. İnanırıq ki, təqdim etdiyimiz bu məlumat adını eşidib, üzünü görmədiyimiz bu şəxsi tanımaq istəyənlər üçün önəmli informasiya rolunu oynayacaq.
İbrahimpaşa Hüseyn oğlu Dadaşov sovet dövrünün ən məşhur güləşçilərindən olub.
O, 10 aprel 1926-cı ildə anadan olub.
Sərbəst güləş ustası olan İ. Dadaşov dəfələrlə SSRİ çempionluğu üzrə yarışlara qatılıb və qalib olub.
O, 62 və 67 kiloqram çəki dərəcələri üzrə güləş yarışlarına qatılıb və medala layiq görülüb.
İ. Dadaşov 1949-cu ildə SSRİ-də keçirilən sərbəst güləş üzrə çempionatda qalib olub.
O dövrdə bu çox böyük uğur sayılırdı.
Bu qələbədən ruhlanan İbrahimpaşa Dadaşov 1951-ci ildə də SSRİ-də keçirilən çempionatda qalib olub.
Bu qalibiyyət İ. Dadaşova Azərbaycanda böyük şöhrət qazandırıb və 1952-ci ildə keçirilən yarışdada qalib adını qazanıb.
Qazandığı bu uğurlar İbrahimpaşa Dadaşovu arxayınlaşdırmır və 1956-cı ildə də SSRİ-də keçirilən çempionatda qalib olub.
Çəkdiyi zəhmət, qazandığı uğurlar nəzərə alınaraq İbrahimpaşa Dadaşov “SSRİ Əməkdar idman ustası” və “SSRİ əməkdar məşqçisi” adlarına layiq görülüb.
Peşəkar güləşçi kimi karyerasını başa vurduqdan sonra məşqçilik fəaliyyəti ilə məşğul olub və güləşin sirlərini yetirmələrinə öyrədib.
O, bir çox güləşçiləri SSRİ miqyasında keçirilən yarışlara hazırlayıb.
Məsələn, dünya və Avropa çempionu, 1964-cü ildə keçirilən Yay Olimpiya Oyunlarının bürünc mükafatçısı Aydın İbrahimovun məşqçisi İbrahimpaşa Dadaşov olub.
İbrahimpaşa Dadaşov 16 iyul 1990-cı ildə 64 yaşında vəfat edib.
İ. Dadaşov haqq dünyasına köçsə də, hər gün adını daşıyan küçədən keçənlər onu xatırlayır və rəhmət oxuyurlar.
Məkanı cənnət olsun.
Hazırladı: Bineqedi.com saytı
