Binəqədi Rayon İcra Hakimiyyəti, Yeni Azərbaycan Partiyası Binəqədi rayon təşkilatı, Binəqədi Rayon Gənclər və İdman İdarəsi və “Binəqədi Gənclər Evi” sosial xidmət müəssisəsinin birgə təşkilatçılığı ilə Binəqədi rayonunda fəaliyyət göstərən şəhid Qorxmaz Baxşıyev adına 179 nömrəli tam orta məktəbdə Aprel döyüşlərinin ildönümünə həsr olunmuş tədbir keçirilib.
Bineqedi.info saytına verilən məlumata görə, tədbirdən öncə rayon ictimaiyyəti, Azərbaycan Universitetinin təsis etdiyi “Şəhid Fəxrəddin Qurbanlı adına təqaüd”ə layiq görülən tələbələri və pedoqoji heyəti, şəhidlərimizin döyüş yoldaşları, məktəblərin müəllim və şagird kollektivi Aprel döyüşlərində böyük hünər, rəşadət göstərərək şəhidlik zirvəsinə yüksəlmiş Vətən oğulları- Fəxrəddin Qurbanlı və Emin Bağırovun və Vətən müharibəsi şəhidlərinin ailə üzvləri şəhidlərimizin məzarlarını ziyarət etdilər.
Tədbir torpaqlarımız uğrunda şəhadətə yüksəlmiş Şəhidlərimizin əziz xatirəsi bir dəqiqəlik sükütlə yad edildikdən sonra Azərbaycan Respublikasının Dövlət himni ilə açıq elan edildi.
İlk öncə çıxış edən 179 nömrəli tam orta məktəbin direktoru Bəyaz Novruova məktəb kollektivi adından qonaqları salamlayaraq, Aprel döyüşlərinin Azərbaycan xalqının mənəvi dirçəlişi üçün dönüş nöqtəsi olduğunu vurğuladı.
Çıxış edən YAP Binəqədi rayon təşkilatının sədri Vüsar İsmayılov 2016-cı il Aprel döyüşlərinin Vətən müharibəsində aldığımız xoş xəbərlər üçün ilk addım olduğunu və Azərbaycan xalqını öz doğma torpaqlarına qayıdacaqlarına əmin etdiyini bildirdi. Aprel döyüşlərində qazanılan qələbənin Azərbaycan Respublikasının Prezidenti cənab İlham Əliyevin uzaqgörən diplomatiyasının, uğurlu daxili və xarici siyasətinin, sərkərdə məharətinin, hər zaman ölkə başçısının diqqət və qayğısı ilə əhatə olunan silahlı qüvvələrimizin peşəkarlığının, vətənpərvərliyinin və xalqın birliyinin sayəsində mümkün olduğunu və Aprel döyüşlərinin Zəfər tariximiz üçün böyük əhəmiyyət kəsb etdiyini söylədi, tədbirdə xatirəsi anılan şəhidlərin ruhuna ehtiramını bildirdi.
Sonra çıxış edən Binəqədi Rayon İcra Hakimiyyəti başçısının müavini Sevinc Süleymanova bildirdi ki, Aprel zəfəri 44 günlük Vətən müharibəsindəki parlaq qələbənin, torpaqlarımızın azad olunmasının və böyük qayıdış salnaməsinin başlanğıcı oldu. Azərbaycan Respublikasının Prezidenti, Ali Baş Komandan cənab İlham Əliyev Ulu Öndərin vəsiyyətlərinə sədaqətlə əməl edərək onun siyası kursuna əsaslanıb özünəməxsus cəsarət, qəhrəmanlıq və qətiyyət göstərdi. Xalq- ordu birliyi sayəsində işğal altında olan torpaqlarımızı erməni təcavüzkarlarından təmizlədi, dövlətimizin bütövlüyünü təmin etdi. Aprel döyüşlərindəki qələbəmizdən sonra ilk dəfə doğma yurd həsrəti çəkən bir qrup məcburi köçkünlərimiz öz dədə-baba torpaqlarına qayıtdı və tez bir zamanda bütün məcburi köçkünlərimiz bu gün sürətlə günü-gündən abadlaşan, gözəlləşən və hər bir şəraiti olan döğma ocaqlarına qayıdacaqlar.
Çıxış edənlər – şəhid Fəxrəddin Qurbanlının atası Seyfəddin Qurbanov və şəhid Emin Bağırovun qardaşı Yaqub Bağırov şəhidlərimizin xatirəsini hər zaman uca tutan və hər zaman şəhid ailələrinə göstərilən xüsusi diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildirdilər.
Tədbir şəhidlərin xatirəsinə şagirdlərin hazırladığı musiqi və şeir kompazisiyaları ilə davam etdi.
Bineqedi.info




















































