Xəbər verdiyimiz kimi, təhsil naziri Ceyhun Bayramov bildirib ki, 2020-2021-ci tədris ilindən etibarən artıq ali təhsil müəssisələrinə qəbul yeni təsnifat əsasında aparılacaq:
“Müasir dünyada peşələr və ixtisaslar çox sürətlə dəyişir. Bunu nəzərə alaraq, müəyyən vaxtdan bir ixtisasların təsnifatına yenidən baxılır, yeni ixtisaslar təsdiq edilir. 2019-cu ilin fevral ayında Nazirlər Kabineti ali təhsilin bakalavriat və magistratura səviyyələri üzrə yeni ixtisas təsnifatı təsdiq edib. Hazırda ali təhsil müəssisələri tədris proqramlarını yeniləyir”.
Təhsil eksperti Kamran Əsədov bildirib ki, ali təhsil müəssisələrinin tədris proqramını yeniləməsi müsbət addımdır:
“Gələcəkdə ölkədə hansısa ixtisasların, sənətlərin sıradan çıxması və yenilərinin yaranması prosesi sürətlə getməyə başlayacaq. Bu prosesi izləyən biri kimi deyim ki, 50 il bundan qabaq ali təhsil almaq, yəni 5 il oxumaq 25-35 il ondan istifadə etməyə bəs edirdi. İndi isə öz ixtisasımızı ən azı 4-5 dəfə dəyişməliyik. Çünki buna bir ali təhsil kifayət etmir. Təhsilin də əsas məqsədi müəyyən dəyərləri gənclərə öyrətməkdir. Dəyərlər necə olacaqsa, hansı biliklərə ehtiyac yaranacaqsa, ali məktəblərdə o fənləri tədris edəcəklər”.
K.Əsədov qeyd edib ki, ixtisaslar sıradan çıxmayacaq, biri digərinin içərisində əriyəcək:
“Məsələn, Fizika və kimya fakültəsi gələcəkdə Fizkimya, Biologiya və Fizika ilə birləşərək Biofizika ola bilər. Bir sözlə, fənlərarası, sahələrarası oblastlar inkişaf etməlidir. Bir insan ömründə 5 dəfə ixtisas dəyişməlidir. Yeni ixtisasları zaman özü diktə edəcək. Fakültələrdə tədris olunacaq fənlər, proqramlar dəyişəcək.
Yeni qloballaşmanın gətirdiyi problemlər onu göstərir ki, beyni artıq informasiya ilə yükləyən elmlər sıradan çıxmalıdır. Bir mövzunu öyrənmək üçün saysız-hesabsız nəzəriyyələri qədimdən indiyə kimi öyrədirlər. Bunlar insanın beynini lazımlı və lazımsız informasiyalarla yükləyir. Tələbələr elə kitabları oxuyur, əzbərləyir ki, imtahan verib canını qurtarsın.
Beyində əsas, vacib baza informasiyalarını yerləşdirmək lazımdır. Onsuz da qalan şeyləri beyin özü axtarıb tapacaq. Yeni dövr bunu zəruri hesab edir. Buna görə hansı fənlərin sıradan çıxacağını bir-bir saymıram. Faydasız informasiyalarla beyni dolduran fənlər olmayacaq. Gələcəkdə okeanı, onun dərinliyini, kosmosu, Yer kürəsində insan mühitini, ekoloji məsələləri öyrənəcəyik. Yəni, Yer üzünün xilası və tərəqqisi ilə bağlı elmlər daha öndə olacaq”.
Ekspert əlavə edib ki, bütün bunlar tələbələrin xeyrinədir, ona görə də narahatlıq keçirməyə əsas yoxdur.lent.az
