Azərbaycan Respublikası Gənclər və İdman Nazirliyi, Təhsil Nazirliyi və Azərbaycan İdman Könüllüləri Ictimai birliyinin birgə imzaladığı əsasnaməyə əsasən, “Çempionumuz” sosial idman layihəsi çərçivəsində Binəqədi rayonu 157 №-li tam orta məktəbdə kikboksinq üzrə Respublika və Dünya Çempionu Nərmin Seyidovanın məktəblilərlə görüşü keçirilib.
Bineqedi.info saytına verilən məlumata görə, tədbirdə Binəqədi rayon Gənclər və İdman İdarəsinin rəis müavini Rüfət Əhmədov, Bakı şəhər Gənclər və İdman Baş İdarəsinin baş məsləhətçisi Elmar İbadlı, Binəqədi rayonu 157 saylı tam orta məktəbin UBTR Natəvan Həsənalıyeva, Azərbaycan Kikboksinq idman növü üzrə Respublika və Dünya Çempionu Nərmin Seyidova, Binəqədi İdman Klubunun direktoru Xəqani Əhmədov iştirak ediblər.
İlk öncə Vətən müharibəsi şəhidlərinin xatirəsi 1 dəqiqəlik sükutla yad edilib.
Daha sonra idarənin rəis müavini Rüfət Əhmədov tədbir iştirakçılarını salamlayaraq tədbirlə bağlı məlumat verib və idmançımızın ümumi idman nailiyyətlərindən söz açıb.
Sonra isə Bakı şəhər Gənclər və İdman Baş İdarəsinin baş məsləhətçisi Elmar İbadlı tədbirin mahiyyəti barəsində çıxış edib.
Çıxışa idmançımız davam edərək məktəb illərindən məlumatlar verib və o vaxtlardan idmana olan marağını xüsusilə vurğulayıb və şagirdlərin suallarını cavablandırıb. Daha sonra məktəbin UBTR Natəvan Həsənalıyeva idmançımızın elə məktəb illərindən idmana olan həvəsindən bəhs edərək ona gələcək yarışlarında uğurlar arzulayıb. Son olaraq söz Binəqədi İdman Klubunun direktoru Xəqani Əhmədova verilib.
Yekunda idmançımıza Binəqədi rayonu Gənclər və İdman İdarəsi tərəfindən ölkədaxili və beynəlxalq yarışlarda əldə etdiyi uğurlara görə “Fəxri Fərman” təqdim edilib, məktəbdə təşkil olunmuş guşədə idmançıyla məktəblilər və pedoqoji heyətin xatirə şəkilləri çəkilib.
Bineqedi.info
