Binəqədi Rayon İcra Hakimiyyətinin dəstəyi, Binəqədi rayon Gənclər və İdman İdarəsinin və 1 saylı Bakı “ASAN xidmət” mərkəzinin birgə təşkilatçılığı ilə “Binəqədi Gənclər Evi” sosial xidmət müəssisəsində 5 dekabr – Beynəlxalq Könüllülər Günü münasibətilə “Könüllülərin gözündə könüllülüklə bağlı” mövzusunda rəsm müsabiqəsi keçirilib.
Bineqedi.info saytı xəbər verir ki, tədbirdə Binəqədi rayon Gənclər və İdman İdarəsinin rəisi Namiq Tarverdiyev, 1 saylı Bakı “ASAN xidmət” mərkəzinin könüllülər üzrə məsul şəxs Allahşükür Məmmədov və könüllülər iştirak etmişdir.
Rəsmi hissədən əvvəl könüllülərin əl işlərindən ibarət sərgiyə baxış keçirildi.
Tədbiri giriş sözü ilə açan Binəqədi rayon Gənclər və İdman İdarəsinin rəisi Namiq Tarverdiyev qeyd etdi ki, 5 dekabr Beynəlxalq Könüllülər Günü qlobal sülh və inkişaf naminə 1985-ci ildə BMT Baş Assambleyası tərəfindən təsis edilib. Azərbaycanda olan könüllülük hərəkatı, əsası ümummilli lider Heydər Əliyev tərəfindən qoyulmuş və Azərbaycan Respublikasının Prezident İlham Əliyevin davam etdirdiyi gənclər siyasətinin bariz nəticələrindən biridir.
Sonra 1 saylı Bakı “ASAN xidmət” mərkəzinin könüllülər üzrə məsul şəxsi-Allahşükür Məmmədov çıxış edərək könüllüləri “5 dekabr Beynəlxalq Könüllülər Günü” münasibətilə təbrik etdi.
Tədbirin sonunda könüllü gənclərə Sertifikatlar təqdim olunmuşdur.
Bineqedi.info
