Bakı Şəhər Mədəniyyət Baş İdarəsi Xətai rayon Mərkəzi Kitabxana Sisteminin Mərkəzi Kitabxanasının təşkilatçılığı ilə İkinci Qarabağ döyüşlərinin iştirakçısı Elnur Bağırovla virtual görüş keçirilib.
Bineqedi.info saytına verilən məlumata görə, Elnur Bağırov 1999-cu ildə Bakı şəhərinin Binəqədi rayonunda anadan olub. 2017-ci ildə Binəqədi rayonu R. Pirnəzərov adına 299 nömrəli tam orta məktəb-liseyini bitirdikdən sonra hərbi xidmətə yollanıb.
2019-cu ildə xidmət müddəti başa çatdığı üçün ehtiyata buraxılıb. Elə həmin ildə Qərbi Kaspi Universitetinin İctimai və Siyasi Elmlər fakültəsinin Regionşünaslıq ixtisasına qəbul olunub. Hazırda həmin universitetin 2-ci kurs tələbəsidir.
Görüşdə Elnur Bağırov öz döyüş yolundan, Qarabağın azad edilməsi uğurunda döyüşlərdə igidlik göstərən mərd oğullarımızdan danışıb.
Elnur Bağırov Vətən müharibəsində tibb məntəqəsinin sanitar təlimatçısı vəzifəsini icra etdiyini bildirib. O, döyüşlərdə yaralı əsgərlərimizi necə xilas etməsindən söhbət açıb. Yaralı əsgərlərimizin, ağrılara mərdliklə necə sinə gəldiyini söyləyib.
Döyüşçümüz həmçinin Qarabağın gözəlliyi qarşısında valeh olduğunu bildirib.
Sonra döyüşçü izləyicilər tərəfindən ona verilən sualları cavablandırıb.
Bineqedi.info
