Binəqədi Rayon İcra Hakimiyyətinin və Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Bakı Regional Məşğulluq Filialı birgə təşkilatçılığı ilə “Əmək yarmarkası” tədbiri keçirilib.
Bineqedi.info saytı xəbər verir ki, tədbirdə Binəqədi Rayon İcra Hakimiyyəti başçısının müavini Hacıbaba Babayev, Bakı Regional Məşğulluq filialının müdiri Müseyib Əliyev, Binəqədi Rayon İcra Hakimiyyəti başçısı Aparatının məsul əməkdaşları və Dövlət Məşğulluq Agentliyinin və Bakı Regional Məşğulluq filialının məsul əməkdaşları iştirak ediblər.
Binəqədi Rayon İcra Hakimiyyəti başçısının müavini Hacıbaba Babayev Binəqədi rayonunda əhalinin məşgulluğu sahəsində görülmüş koordinasiyalı işlərin effektiv nəticəsi və nəzərdə tutulan layihələr barədə tədbir iştirakçılarına məlumat verib.
Bakı Regional Məşğulluq Filialının müdiri Müseyib Əliyev karyera planlaması istiqamətində həyata keçirilən layihələr və görülməsi nəzərdə tutulan işlər, eyni zamanda, əmək bazarına keçid etməyə hazırlaşan gənclər üçün yaradılan imkanlar barədə çıxış edib.
Binəqədi Rayon İcra Hakimiyyəti başçısı Aparatının Sosial-İqtisadi İnkişafın Təhlili və Praqnozlaşdırılması şöbəsinin baş məsləhətçisi Ziba Nəcəfova, Binəqədi rayonunda özünəməşğulluq layihəsi çərçivəsində xüsusi həssas qrupdan olan şəxslərə, həmçinin tələbələr və məzunlar üçün yaradılmış şərait barədə məlumatlar verib.
Qeyd edək ki, əməkdaşlıq çərçivəsində baş tutan əmək yarmarkasında 30-a yaxın müəssisə, 750-dən çox vakansiya üzrə, 550-dən çox işsiz və işaxtaran şəxslər iştirak edib.
Bineqedi.info
