Binəqədi Rayon İcra Hakimiyyətinin dəstəyi, Binəqədi rayon Gənclər və İdman İdarəsi, “Binəqədi Gənclər evi” sosial xidmət müəssisəsinin və “GÜVƏN” Xeyriyyə və Dostluq Cəmiyyətinin birgə təşkilatçılığı ilə 3 Dekabr – Beynəlxalq Əlillər Günü münasibətilə, xüsusi qayğıya ehtiyacı olan yeniyetmə və gənclər arasında “Bacarıqlı əllər” müsabiqəsi keçirilib.
Bineqedi.info saytı xəbər verir ki, tədbirdə Binəqədi Rayon Gənclər və İdman İdarəsinin rəisi Namiq Tarverdiyev, “Binəqədi Gənclər evi” sosial xidmət müəssisəsinin direktor səlahiyyətlərini müvəqqəti əvəz edən Zeynal Rəşidli, “GÜVƏN” Xeyriyyə və Dostluq Cəmiyyətinin sədri Nigar Bayramlı, “Vətəndaşların Sosial Rifahı Naminə” İctimai Birliyin sədri İradə Rizazadə və xüsusi qayğıya ehtiyacı olan gənclər iştirak edib.
Tədbiri giriş sözü ilə açan Binəqədi rayon Gənclər və İdman İdarəsinin rəisi Namiq Tarverdiyev əlil insanlara göstərilən dövlət qayğısından, yaradılan şəraitdən və Binəqədi rayon Gənclər və İdman İdarəsi tərəfindən həyata keçirilən tədbirlərdən danışıb. N. Tarverdiyev bu cür tədbirlərin keçirilməsində əsas məqsədin əlilliyi olan şəxslərin cəmiyyətə inteqrasiyası təmin etmək, bacarıqlarının üzə çıxarılması və dəstəklənməsindən ibarət olduğunu qeyd edib.
Sonra “Vətəndaşların Sosial Rifahı Naminə” İctimai Birliyin sədri İradə Rizazadə və GÜVƏN Xeyriyyə və Dostluq Cəmiyyətinin sədri Nigar Bayramlı çıxış edərək, tədbirin təşkil olunub keçirilməsinə görə Binəqədi Rayon İcra Hakimiyyətinə və Binəqədi rayon Gənclər və İdman İdarəsinə öz minnətdarlıqlarını bildiriblər.
Tədbirin sonunda xüsusi qayğıya ehtiyacı olan gənclərə Diplomlar və müxtəlif hədiyyələr təqdim olunub.
Bineqedi.info
